वाढदिवसाची भेट!

  एक असामान्य प्रतिभेचे प्रतीक असे हे 'भेट कार्ड' 

                प्रत्येकाचा वाढदिवस एक 'खास दिवस',आयुष्यात अनुभवांनी भरलेले असे अजून एक वर्ष कमी झाले;कि पुढे जाण्यासाठी एक वर्ष,आणखीन पुढे गेले,मोठ्यांचे शुभाशीर्वाद लाभले!..ह्यातील हवे ते म्हणू शकतो आपण.घरातल्या घरात पूर्वी हा दिवस साजरा होत असे.आज सुद्धा कित्येकांच्या घरात असाच हा घरातल्या घरात साजरा होतो....आई ओवाळते,घरातले सगळे आशीर्वाद देतात गोडाचे जेवण होते..आणि हा आनंदाचा दिवस सर्वांच्या मनात उरतो.ह्या दिवशी काहींच्याकडे  वेस्टर्न कल्चर कडून घेतलेले गाणे"Happy Birthday to you !!" सगळे गात वाढदिवस असलेल्याच्या भोवती जमतात,केक कापून मग शुभेच्छा देऊन केक खाण्यासाठी आणि चेहेऱ्याला लावण्यासाठी वापरण्यात येतो....मग घरातली पार्टी किवा हॉटेल मध्ये देण्यात येणारी मोठी 'बर्थडे पार्टी'....हे हल्ली बऱ्याच ठिकाणी दिसून येते.

                माझ्या लहानपणी माझ्या काही सवंगड्यांना ह्या दिवशी घरी बोलावून सर्वांना छान छान खायला आणि मग मेणबत्या लावलेला केक त्या फुकून त्या वेळी सर्वांनी टाळ्या वाजवून दिलेल्या वाढदिवसाच्या शुभेच्छा! लहानपणी ह्याचे कौतुक वाटायचे.सवंगड्यांनी आणलेल्या भेटवस्तू ह्या सर्वाचे विशेष वाटायचे..नवीन कपडे आणि त्या दिवशी घरातल्या सर्वांकडून होणारे खास लाड,आणि एक मस्त जेवणाचा बेत.माझ्या आवडीचे आई बनवायची.हे असे वाढदिवस ७ वर्षांची होईपर्यंत साजरे झालेले आठवतात.नंतर घरात आई आजी आजोबा बाबा आणि बहिणी सोबत वाढदिवस साजरे केले.मोठेपणी ह्या दिवसाचे महत्व कळू लागले.मुंबई पुण्याकडे राहणाऱ्या जवळच्या नातेवाईकांकडून येणारी वाढदिवस निमित्त पाठवलेली कार्ड,पण हि देखील लहानपणी आलेली आठवतात...ती भेटकार्ड मी ठेवली पण आहेत.लहानपणी घरी आईने बनवलेला केक आणि भेट वस्तू आणि ह्या दिवसाचे एक नाते मनात रुजले होते.तो दिवस हवाहवासा वाटायचा तेव्हां,ह्या गोष्टींसाठी !!एक धमाल यायची.

                नंतर मोठेपणी शाळा कॉलेज,मग वाढदिवशी एक वेगळे वातावरण.'बर्थडे पार्टी'तीपण बाहेर..आम्हीं काही मैत्रिणी मिळून चित्रपटाला पण जात असू..आज आठवतो तो आम्हीं५जणींनी मिळून साजरा केलेला माझा वाढदिवस!बाहेर छानश्या हॉटेल मध्ये जेवण आणि मग एक सर्वांच्या आवडीचा चित्रपट पाहिलेला! लक्षात राहिलेले असे ते आणखीन काही वाढदिवस! ते दिवस परत येत नाहीत हि जाणीव जरी असली तरी ह्या वाढदिवसांनी मला तेव्हां खूप काही दिले इतके दिले कि आज देखील त्या दिवसांनी दिलेले 'ते' गिफ्ट न उघडताच ठेवावेसे वाटते मला!        

              आईने बनवलेल्या घरघुती केक मध्ये जी माया होती,ती आज बाहेरून आणलेल्या केक मध्ये निश्चितच नाही.वाढदिवशी मोठ्यांच्या पायाला हात लावून आशीर्वाद घेतलेले आज पर्यंत सोबत आहेत.आजीने हनुवटीला धरून केलेले कौतुक आणि नवीन कपडे आईच्या मागे लागून मिळवलेला एखादा सलवार कमीज घालून फिरण्यात जी मजा होती ती खासच!

             ह्या वर्षी जो माझा वाढदिवस मी साजरा केला..त्यात अनेकांच्या शुभेच्छा मिळाल्या,अनेकांचे आशीर्वाद देखील लाभले.घरातल्यांचा उत्साह त्याबरोबरच माझा पण ओसंडत होता..बेत साधा केला होता...तसा घरातल्या घरातच वाढदिवस केला,पण ह्या दिवशी एक 'भेटकार्ड' आई बाबांनी पाठवले,जे मला सर्वात मोठी भेट वाटले.ह्या कार्डाची खासियत अशी कि 'हे कार्ड हात नसलेल्यांनी रंगवलेले असे सुंदरकार्ड आहे'.ज्याचे छायाचित्र वर देत आहे.ह्या सर्व कलाकारांनी बनवलेली हि कार्ड विकून त्यांची मेहेनतीची खरी कमाई,आपल्या अपंगत्वावर असा मिळवलेला एक विजय पाहून मनात आदर निर्माण झाला.आपण देवकृपेने धडधाकट निरोगी राहण्याचा प्रयत्न करत असतो.वाढदिवशी आपल्याला ह्याची जाणीव होते.ह्या कार्डाने मला अचानक ह्या दिवशी ह्या कलाकारांच्या कलेचे त्यांच्या जिद्दीचे आणि मेहेनतीचे जे दर्शन घडवून दिले त्यामुळे माझा वाढदिवस खरच सार्थकी लागला असे म्हणावे लागेल!

हा खरच माझ्या आयुष्यातला Happy Happy Birthday ठरला हे नक्की ! ...

          

           ह्या कार्ड चे छायाचित्र तर सर्वांना नक्कीच आवडेल.आणि त्याच्याबद्दल माहिती असलेली वेबसाईट खाली देत आहे.ह्या कलाकारांचे कसब ह्या साईट वरील त्यांच्या कलेचे नमुने पाहून आपणा सर्वांना जाणवेलच!खालील वेब साईट जरून पहा...

www.imfpa.co.in